Веб-сајтот е збир од една или повеќе веб-страни поставени на интернет. Или поинаку кажано, веб-сајтот е колекција од јавно достапни, меѓусебно поврзани веб-страници, поставени на заеднички домен.
Веб-страна (или веб-страница) е една страница од веб-сајтот. До веб-страните се пристапува преку веб-прелистувачи како што се: Chrome, Firefox, Edge, Opera итн. Секоја веб-страна има содржина која е комбинација од текстови, слики, аудио, видео и линкови. Пример за најчести веб-страници кај корпоративните сајтови се: Почетна, Услуги /Производи, За Компанијата, Контакт итн.
Во разговорниот јазик овие два поими често се мешаат, односно поимите веб-страна или веб-страница се користат како замена за поимот веб-сајт. Технички разликата е во тоа што под веб-сајт се подразбира множество од веб-страни, додека веб-страна е само дел, поточно една страница од веб-сајтот.
На интернет има милиони веб-страници со најразлична содржина. Со цел лесно и брзо да може да се стигне до содржина која не интересира, потребно е веб-страниците да се индексираат, процес каде содржината на веб-страницата се обработува и се поврзува со индекс од клучни зборови.
Кога сакате да пребарате нешто на одредена тема потребно е да внесете клучен збор во полето за пребарување на достапните пребарувачи (Search Engines), по што ќе ви бидат дадени веб-сајтови кои се поврзани со клучните зборови по кои пребарувате. Најпознат пребарувач во светот е Гугл.
